ዘቤታዊ ዓመጽ እንታይ እዩ፧

ዘቤታዊ ዓመጽ ኣብ ውሽጢ ስድራቤት ወይ ኣብ ውሽጢ ዝምድና ዝፍጸም ዓመጽ እዩ፥ እዚ ማለት፡ ኣብ መንጎ ሰብ ቃል ኪዳን ወይ መጻምዲ ዝኾኑ ወይ ዝነበሩ፡ ብሓባር ይነብሩን ኣይነብሩን ብዘየገድስ። ኣብ መንጎ ወለድን ቆልዑን ወይ ኣብ መንጎ ኣሕዋት ዝፍጸም ዓመጽ ውን ዘቤታዊ ዓመጽ እዩ።

ዘቤታዊ ዓመጽ ስነ-ኣእምሮኣውን ኣካላውን ጸገማት ከስዕብ ይኽእል። ከምኡውን ዘቤታዊ ዓመጽ ንጥዑይን ማሕበራውን ምዕባለ ቆልዑ እውን ኣብ ሓደጋ የእቱ። እዚ ነቶም ብተዘዋዋሪ መንገዲ ዘቤታዊ ዓመጽ ዝዕዘቡ ቆልዑ ውን ይምልከት።

ንኣሽቱን ዓበይትን፡ ፓስፖርት ስዊዘርላንድ ዘለዎምን ዘይብሎምን ሰባት፡ ሃብታማትን ድኻታትን ስድራቤታት፡ ዝኾነ ሰብ ብዘቤታዊ ዓመጽ ክጽሎ ይኽእል እዩ። ብዙሓት ሰባት ኣብ ስዊዘርላንድ ኣብ ስድራቤት ወይ ኣብ ዝምድናኦም ብዓመጽ ይሳቐዩ። ሓገዝ ክሓቱ ኣገዳሲ እዩ።

ዝተፈላለዩ ዓይነታት ዘቤታዊ ዓመጽ ኣለዉ፥ ኣካላዊ፡ ስነ-ኣእምሮኣዊ፡ ጾታዊ፡ ቁጠባውን ማሕበራውን ዓመጽ። መብዛሕትኡ ግዜ ዝተፈላለየ ዓይነት ዓመጽ ብሓንሳብ ይፍጸም።

ንኣብነት፦ ብቐጻሊ ምጽራፍ፡ ርክባት ምኽልካል፡ ምዕጻው፡ ምቁጽጻር፡ ምድፋእን ምህራምን፡ ጾታዊ ርክብ ምግዳድ፡ ገንዘብ ምውሳድ፡ ቋንቋ ምምሃር ምኽልካል፡ ንቆልዑ ሸለል ምባል። ምፍርራሕን ስቶኪንግ (ምክትል) እውን ዘቤታዊ ዓመጽ ክኸውን ይኽእል እዩ።

ዘቤታዊ ዓመጽ ክልኩል እዩ። ፖሊስ ብዛዕባ ዘቤታዊ ዓመጽ እንተፈሊጦም፡ እቲ ዓመጽ ዘጋጠሞ ሰብ ዋላ እንተዘይደለየ፡ ስጉምቲ ክወስዱ ኣለዎም። ፖሊስ ድሕነት ኩሎም እቶም ኣብዚ ጉዳይ ዝተሳተፉ ሰባት የረጋግጹን ነቲ በቲ ዓመጽ ዝተሃስየ ሰብን ነቲ ዓመጽ ዝፈጸመ ሰብን በበይኖም ቃለ-መሕትት ይገብሩሎም። ዓመጽ ዘዘውትር ወይ ብኸምኡ ዘፈራርሕ ሰብ: ካብቲ ኣፓርታማ ወይ ገዛ ንዝተወሰነ ግዜ ክስጉዎ ይኽእ ሉ።

ኣብ መብዛሕትኡ እዋን ፡ ከከምቲ ዘጋጠመ ጉዳይ፡ ፖሊስ ብኡንብኡ ናይ ክሲ መስርሕ የበግሱ።

ትካል ምኽሪ ግዳያት ካንቶን ግላሩስ ኣብ ስድራቤት ወይ ኣብ (ሕሉፍ) ዝምድና ዓመጽ ዘጋጥሞም ሰባት ይመክርን ይሕብርን። እዚ ሓገዝ ብነጻ እዩ። ዝቕጽሉ ስጉምትታት ምስ ሞያውያን ክኢላታት ብሓባር ክውጠኑ ይኽእሉ።

ሰራሕተኛታት ትካላት ምኽሪ ግዳያት ዝሰምዕዎ ብሚስጢር ክዕቅብዎ ይግደዱ። እዚ ማለት፡ ብዛዕባ እቲ ዝተካየደ ዝርርባት ንዝኾነ ሰብ ክሕብሩ ኣይፍቀደሎምን እዩ ማለት እዩ። ፖሊስ ውን ከይተረፈ።

• ጥብቆ ናይ ትካል ምኽሪ ግዳያት ካንቶን ግላሩስ፥ ቴለፎን 055 646 67 36