Largimi (heqja) i mbeturinave

Ndarja e mbeturinave ndihmon në mbrojtjen e ambientit dhe në kursimin e parave. Për mbeturina të cilat riciklohen dhe ato të cilat e dëmtojnë mjedisin ka pika speciale grumbulluese ose pika mbledhëse (letra, bateritë, xhami, kartoni, mbeturinat e gjelbërta, alumini, metali, tekstili, vaji etj). Këto mbeturina nuk duhet të hidhen në mbeturinat shtëpiake. Çdo Komunë e ka planin e vet për heqjen e mbeturinave (Entsorgungsplan) ose kalendarin për heqjen e mbeturinave (Abfallkalender), i cili merret kur lajmëroheni në Komunë. Aty është e shkruar cilat mbeturina kur dhe ku lejohet hidhen. Është e ndaluar të digjen mbeturinat ose të hudhen në vendet të cilat nuk janë të parapara për këtë. Shishet e plastikës (PET-Flaschen) dhe paketimet e tjera mund të kthehen gratis gati në të gjitha pikat e shitjes.

Mbeturinat të cilat nuk mund të riciklohen (mbeturinat shtëpiake), duhet të hudhen në thasët zyrtar për mbeturina ose në thasë me marka të mbeturinave. Në çmimin e thasëve ose markave është e përfshirë taksa e heqjes së mbeturinave. Për heqjen e mbeturinave shtëpiake duhet të përdoren thasët me taksë zyrtare "Glarner" ose markat e mbeturinave. Këto mund të gjenden p. sh. në qendrat tregëtare ose shitore. Thesi me mbeturina duhet të vendoset në skaj të rrugës ditëve të caktuara javore (në raste të rralla te ndonjë pikë grumbullimi). Nuk lejohet që mbeturinat të deponohen në ndonjë ditë tjetër. Në shtëpitë me shumë familje nganjëherë ka kontainer special për mbeturina. Nëse keni pyetje mund tïu ndihmojnë Komuna ose fqinjët.

Mbeturinat e veçanta (Sonderabfälle) duhet të mënjanohen posaçëm, meqë ato përmbajnë substanca helmuese ose e dëmtojnë mjedisin. Këto janë p.sh. ngjyrat, kemikaliet, bateritë, artikujt elektrik, lampat për kursim të energjisë ose edhe barnat e skaduara. Këto kursesi nuk guxoni ti hidhni në mbeturina shtëpiake. Këto kryesisht mund t`i ktheni ku i keni blerë. Prodhuesi dhe tregëtarët janë të detyruar që këto mbeturina t`i pranojnë pa shpenzime.